October 25, 2021

نيوٽرل وينيو تي کيڏڻ کان انڪار، دورا رد ڪرڻ جا معاملا آءِ سي سي ۾ اٿارينداسين: پي سي بي

لاهور (ويب ڊيسڪ) پاڪستان ڪرڪيٽ بورڊ جي چيئرمين رميز راجا واضح اعلان ڪيو آهي ته هاڻ پنهنجي ڪا به هوم سيريز کيڏڻ لاءِ نيوٽرل وينيو تي نه وينداسين.

ورچوئل پريس ڪانفرنس ڪندي رميز راجا چيو ته اسان ڪنهن ميچ جو بائيڪاٽ نه ڪنداسين، اهو ڄاڻڻ ضروري آهي ته اسان سان ائين ڇو ڪيو ويو؟ پنهنجي خودداري ۽ ڪرڪيٽ لاءِ سخت فيصلا ڪرڻا پوندا.

هن چيو ته اسان لاءِ هيل تائين سبق ئي سبق آهي، خبر پئجي رهي آهي ته ڪير دوست آهي، ڪير گڏ بيٺو آهي، اهي سڀ اسان وٽ هڪ مائينڊ سيٽ سان ايندا آهن، اسان کي ڊهڻو ناهي، گڏجي اڳتي وڌڻو آهي.

سندس موجب هاڻ ائين نه ٿيندو ته اهي پنهنجو مطلب ڪڍن ۽ هليا وڃن، نيوزيلينڊ کي ٿريٽ هو ته شيئر ڪري ها، هاڻ دبئي پهچڻ کانپوءِ ئي ٻڌائن، اسان کي پنهنجي پوزيشن جي حساب سان اننگز کيڏڻي آهي.

رميز راجا چيو ته نيوزيلينڊ ۽ انگلينڊ طرفان دورا رد ڪرڻ جا معاملا آءِ سي سي ۾ اٿارڻا آهن، ڪهڙو خطرو هو جو اهي اوچتو ڀڄي ويا، کين ٻڌائڻو پوندو، اسان جي جذبن جو قدر نه ڪيو ويو.

پي سي بي چيئرمين نيوزيلينڊ ۽ انگلينڊ جي انڪار کانپوءِ ايشيائي بلاڪ ٺاهڻ جو به اشارو ڏنو ۽ چيو ته جيڪي اسان سان گڏ آهن، انهن کي گڏ کڻي هلنداسين.

هن اهو به چيو ته جيڪڏهن ڪرڪيٽ برادري جو رويو اهڙو ئي رهيو ته اسان به اڳتي هلي ڪنهن ڳالهه جو لحاظ نه ڪنداسين، جڏهن ته سيريز تي ايندڙ خرچن جي ادائيگي لاءِ نيوزيلينڊ کي خط لکي ڇڏيو آهي.