October 26, 2021

نيوزيلينڊ ۽ انگلينڊ جو پاڪستان سان سيريز نه کيڏڻ شرمناڪ آهي: آسٽريلوي ڪامينٽريٽر

اسلام آباد (ويب ڊيسڪ) جڳ مشهور آسٽريلين ڪامينٽريٽر مائيڪ هيزمين پاڪستان خلاف سيريز نه کيڏڻ تي نيوزيلينڊ ۽ انگلينڊ ڪرڪيٽ بورڊن تي ڇتي تنقيد ڪئي آهي.

خانگي ٽي وي چئنل سان ڳالهائيندي مائيڪ هيزمين چيو ته نيوزيلينڊ طرفان پاڪستان جو دورو رد ڪرڻ افسوسناڪ آهي، دورو رد ڪرڻ کانپوءِ روز ڪجهه نيون خبرون ٻڌي رهيو آهيان، جنهن سان ڏُک ٿي رهيو آهي.

هن چيو ته انگلش رانديگرن کان پڇڻ بنا انگلينڊ جو پاڪستان دورو رد ڪيو ويو، جيڪو سراسر غلط آهي، نيوزيلينڊ به دورو رد ڪيو پر سيڪيورٽي ٿريٽ بابت نه ٻڌايو، جڏهن توهان عالمي سطح جي ڪرڪيٽ کيڏي رهيا آهيو ته سيڪيورٽي ٿريٽ جو ثبوت ڏيکارڻ گهرجي.

سندس چوڻ هو ته پاڪستان ڪورونا جي ڏکي صورتحال ۾ انگلينڊ جو دورو ڪيو پر انگلينڊ طرفان پاڪستان جو دورو رد ڪرڻ هڪ شرمناڪ فيصلو آهي، آءِ سي سي کي اهي معاملا ڏسڻ گهرجن، ڇو ته انگلينڊ جيڪو ڪجهه ڪري رهيو آهي، اهو قبولڻ جوڳو ناهي.

مائيڪ هيزمين وڌيڪ چيو ته جيڪڏهن مون کي پاڪستان ۾ ڪو خطرو محسوس ٿئي ها ته نيشنل ٽي ٽوئنٽي ڪپ ۾ ڪامينٽري ڪرڻ لاءِ نه اچان ها، پاڪستاني ماڻهو ڏاڍو پيار ڪندڙ آهن، مان پاڪستان ۾ ڪم ڪري سدائين خوشي محسوس ڪئي، پاڪستان ۾ ڪرڪيٽ جي ٽئلينٽ کان متاثر آهيان.

هن چيو ته مان نيشنل ٽي ٽوئنٽي ڪپ کي ڀرپور طريقي سان انجواءِ ڪري رهيو آهيان ۽ ڏکئي وقت ۾ پاڪستان سان گڏ آهيان، دنيا کي ٻڌائڻ چاهيان ٿو ته پاڪستان ڪرڪيٽ لاءِ ٻين ملڪن جيان محفوظ آهي.