October 4, 2023

سنڌ ڪابينا ٻوڏ وگهي تباهه ٿيل گهرن جي تعمير لاءِ 50 ارب رپين جي منظوري ڏئي ڇڏي

1 min read

ڪراچي (16 نومبر): سنڌ جي وڏي وزير سيد مراد علي شاهه جي صدارت هيٺ صوبائي ڪابينا جي اجلاس ۾ ٻوڏ متاثرن جي تباهه ٿيل گهرن جي تعمير لاءِ 50 ارب رپين جي منظوري ڏني وئي. تباهه ٿيل گهرن جي هر هڪ مالڪ کي گهر جي تعمير شروع ڪرڻ لاءِ اڳ ۾ 50 هزار رپيا ڏنا ويندا ۽ جڏهن تعمير ڀتين کڻڻ تائين پهچندي ته باقي 250000 رپيا تعمير مڪمل ڪرڻ لاءِ لاڳاپيل مالڪ جي بئنڪ اڪائونٽ ۾ منتقل ڪيا ويندا. سنڌ جي وڏي وزير سمورا فيصلا ڪابينا ميمبرن سان صلاح مشوري سان ڪيا. اهڙن خيالن جو اظهار اطلاعات واري صوبائي وزير شرجيل انعام ميمڻ اربع ڏينهن سنڌ آرڪائيوز بلڊنگ ۾ پريس ڪانفرنس ڪندي ڪيو. ياد رهي ته وزيراعليٰ هائوس ۾ اجلاس ٿيو جنهن ۾ صوبائي وزيرن، صلاحڪارن، خاص مددگارن، چيف سيڪريٽري سهيل راجپوت، چيئرمين پي اينڊ ڊي حسن نقوي، وڏي وزير جو پرنسپل سيڪريٽري فياض جتوئي ۽ ٻين لاڳاپيل سيڪريٽرين شرڪت ڪئي. سڌ سماءَ واري صوبائي وزير شرجيل ميمڻ ڪابينا جي فيصلن بابت ميڊيا کي هيٺئين ڄاڻايل نقطن تحت ڄاڻ ڏني.
ربيع جي فصل لاءِ سبسڊي: وڏي وزير جي زراعت بابت صلاحڪار منظور وساڻ ڪابينا کي بريفنگ ڏيندي ٻڌايو ته تازي ٻوڏ سبب 3.6 ملين ايڪڙ زمين تي تيار فصل تباهه ٿي جڏهن ته هارين کي 421 ارب رپين جو نقصان پهتو آهي. منظور وساڻ چيو ته ڪڻڪ جي ٻج جي مفت فراهمي شروع ڪرڻ تي اتفاق ٿيو آهي جنهن لاءِ 13.5 ارب رپيا گهربل آهن. هن وڌيڪ چيو ته سنڌ حڪومت 8.39 ارب رپيا جڏهن ته وفاقي حڪومت 4.7 ارب رپيا ڏنا. 5 هزار رپيا في ايڪڙ معاوضي لاءِ فنڊز جي طريقيڪار بابت ڳالهائيندي منظور وساڻ چيو ته تعلقي ۽ ضلعي سطح تي ڪميٽيون جوڙيون ويون آهن جڏهن ته ڊي جي زراعت جي نگراني ۾ صوبائي ڪميٽي پڻ جوڙي وئي آهي. پيپلز پارٽي جي چيئرمين بلاول ڀٽو زرداري جي صدارت هيٺ ٻوڏ جي صورتحال بابت جائزو ورتو ويو هو جنهن ۾ وڏي وزير جي زراعت بابت صلاحڪار، وزير اطلاعات ۽ مڪاني ادارن واري وزير تي ٻڌل ڪميٽي جوڙي وئي. ڪميٽي 15 نومبر تي هڪ ابتدائي اجلاس ڪوٺايو جنهن ۾ اها ڳالهه سامهون آئي ته عمل کي تيز ڪرڻ لاءِ هر هڪ تپا (TAPPA) سطح تي هڪ واڌو ڪميٽي جوڙي سگهجي ٿي جنهن ۾ تپيدار، زرعي فيلڊ اسسٽنٽ، ضلعي ڪائونسل جا ميمبر ۽ ٻيا شامل هوندا جيڪي ڊيٽا گڏ ڪرڻ ۾ مدد ڪندا. ڪابينا زراعت کاتي کي هدايت ڪئي ته هو جلد کان جلد ڊيٽا گڏ ڪري ته جيئن هارين کي فنڊ فراهم ڪري سگهجن.
ٻوڏ متاثرن لاءِ گهرن وارو منصوبو: صوبائي ڪابينا ٻوڏ متاثرن بابت پيپلز هائوسنگ (SPFH) جي لاءِ 50 ارب روپين جي منظوري ڏني آهي جيڪا گذريل فنانسنگ تحت ٻوڏ متاثرن لاءِ استعمال ڪئي ويندي ته جيئن هيستائين مڪمل ريت تباهه ٿيل گهرن تي خرچ ڪيا وڃن ته جيئن ورلڊ بئنڪ فنانسنگ اچڻ تائين ان منصوبي جي ادائيگي ڪري سگهي. ڪابينا فيصلو ڪيو ته تباهه ٿيل گهرن جي هر هڪ مالڪ کي تعمير شروع ڪرڻ لاءِ اڳ ۾ 50 هزار رپيا ڏنا ويندا ۽ جڏهن ڪم ڀتين کي کڻڻ تائين پهچندو ته باقي 250000 هزار رپيا ڏنا ويندا. صوبائي ڪابينا سموري عمل کي شفاف بڻائڻ لاءِ ناليواري اين جي اوز کي شامل ڪرڻ جو فيصلو ڪيو. ياد رهي ته ٻوڏ سبب 17 لک گهرن کي نقصان پهتو آهي، سمورن تباهه ٿيل گهرن جي تعمير تي 160 ارب رپيا خرچ ايندا جنهن مان ورلڊ بئنڪ 110 ارب رپيا ڏيڻ جو واعدو ڪيو آهي باقي رقم جو بندوبست صوبائي حڪومت، وفاقي حڪومت، ٻين ذريعن ۽ ڊونرز ذريعي ڪيو پيو وڃي.
ڳوٺن ۾ بجلي پهچائڻ: توانائي واري صوبائي وزير امتياز شيخ ڪابينا ۾ ڳوٺن جي اليڪٽرفڪيشن وارو ايجنڊا پيش ڪندي چيو ته سنڌ حڪومت سالياني ترقياتي پروگرام تحت ڳوٺن ۾ بجلي جي فراهمي لاءِ لڳاتار گهربل قدم کڻي رهي آهي ۽ اليڪٽرفڪيشن لاءِ ڳوٺن جي چونڊ ۾ اهي ڳوٺ شامل آهن جن جي آبادي 100 يا ان کان مٿي آهي، اهي ڳوٺ جيڪي موجوده 11 ڪي وي لائين کان 4 ڪلوميٽر کان وڌيڪ نه هجن ۽ ايڇ ٽي لائين کان اڌ ڪلوميٽر جي پنڌ تي موجود ڳوٺن کي ترجيح ڏني وڃي. ڪابينا کي ٻڌايو ويو ته حيسڪو کي 10890 ڳوٺن کي بجلي فراهم ڪرڻ لاءِ 6609.161 ملين رپيا ڏنا ويا آهن جن مان حيسڪو 5613.593 ملين رپين جي لاڳت سان 5108 ڳوٺن کي بجلي فراهم ڪئي آهي جڏهن ته 754.204 ملين رپين جي لاڳت سان 337 ڳوٺن کي بجلي فراهم ڪرڻ جو ڪم جاري آهي ۽ 5445 ڳوٺن لاءِ 6367.797 ملين رپين جي لاڳت سان اليڪٽرڪ آرڊر فزيبلٽي مرحلن هيٺ آهن. امتياز شيخ ٻڌايو ته 151.737 ملين رپيا باقي بچيل آهن جيڪي وڌيڪ ڳوٺن کي بجلي پهچائڻ لاءِ استعمال ڪرڻ جي اجازت ڏئي سگهجي ٿي. جنهن تي ڪابينا رٿ جي منظوري ڏني. توانائي واري صوبائي وزير امتياز شيخ ڪابينا کي ٻڌايو ته سيپڪو کي 15 لک کان وڌيڪ ڳوٺن کي بجلي فراهم ڪرڻ لاءِ 3499.634 ملين رپيا ڏنا ويا جنهن تي 2952.209 ملين رپين جي لاڳت سان 2909 ڳوٺن کي بجلي فراهم ڪئي وئي ۽ 3893 ڳوٺن جا ورڪ آرڊر جاري ڪيا ويا آهن. هن وڌيڪ ٻڌايو ته 3227 ڳوٺن جي اليڪٽريفڪيشن جي منظوري ڏني وئي ۽ 151 ڳوٺن جي اليڪٽريفڪيشن جي منظوري جي عمل هيٺ آهي جڏهن ته 318 ڳوٺن جي اليڪٽريفڪيشن جو ڪم جاري آهي. ساڳي ريت ڪي-اليڪٽرڪ کي 103.180 ملين رپيا ڏنا ويا جن 12 ڳوٺن کي بجلي فراهم ڪئي. ڪابينا توانائي کاتي کي هدايت ڪئي ته ڳوٺن کي متبادل توانائي واري حل جهڙوڪ سولر پي وي ٽيڪنالوجي ذريعي ننڍن/مائڪرو گرڊ ذريعي سولرائيزيشن، سولر هوم سسٽم جي فراهمي، سولر بيسڊ اسٽريٽ لائيٽس، سولر ٽيوب ويلز ۽ ٻين ڪيترن ئي استعمال ذريعي ڳوٺن تائين بجلي پهچائڻ واري ڪم کي تيز ڪيو وڃي. ڪابينا پاران منظور ڪيل سولرائيزيشن انرجي ڊپارٽمينٽ پاران ڪيو ويندو ۽ لاڳاپيل لوازمات سان گڏ نوان/اضافي ٽرانسفارمرز جي فراهمي پڻ ڳوٺ جي اليڪٽريفڪيشن پروگرام ۾ شامل آهي.
صحافين لاءِ ڪميشن: اطلاعات واري صوبائي وزير شرجيل ميمڻ ڪابينا کي آگاهي ڏني ته سنڌ پروٽيڪشن آف جرنلسٽس اينڊ ٻين ميڊيا پريڪٽيشنرز ايڪٽ 2021ع صوبائي اسيمبلي نافذ ڪيو آهي ۽ ان جو نوٽيفڪيشن آگسٽ 2021ع ۾ ڪڍيو ويو جڏهن ته قانون بابت نوٽيفڪيشن پڻ جاري ڪيو ويو آهي. شرجيل ميمڻ جسٽس رٽائرڊ رشيد رضوي جي سربراهي ۾ 14 رڪني ڪميشن جو مسودو پيش ڪيو جنهن ۾ 4 اڳوڻا سرڪاري ميمبر شامل آهن جن ۾ سيڪريٽري اطلاعات، گهرو سيڪريٽري، قانون وارو سيڪريٽري ۽ سيڪريٽري شامل آهن جڏهن ته 9 غير سرڪاري ميمبر شامل ڪيا ويا جن ۾ KJU جو فهيم صديقي، APNS جو قاضي اسد، CPNE جو ڊاڪٽر جبار خٽڪ، PBA جو اطهر قاضي، سنڌ بار ڪائونسل جو اياز تنيو، HRCP جو پروفيسر توصيف خان، APA جي شازيه عمر، MPA سيده ماروي ۽ APNEC جو غلام فريد الدين شامل آهن. ڪابينا ڪميشن جي قيام جي منظوري ڏئي ڇڏي.
مينپڙي ايڪٽ 2019: گهرو کاتي ڪابينا ۾ سنڌ اندر گٽڪو ۽ مينپڙي جي پيداوار، ذخيري، وڪرو ۽ استعمال ايڪٽ 2019ع ۾ ترميم پيش ڪندي چيو ته بل ۾ ترميم صوبائي اسيمبلي جي اسٽينڊنگ ڪميٽي آڏو التوا هيٺ آهي. ڪابينا، آئيني پٽيشن نمبر S-349/2021 تحت سنڌ هاءِ ڪورٽ وٽان جاري ڪيل حڪم موجب موجوده ايڪٽ ۾ ڪجهه اضافي ترميمن کي شامل ڪرڻ جي منظوري ڏني ته جيئن غير قانوني تياري، پيداوار، ذخيرو، وڪرو ۽ استعمال تي پابندي لڳائي سگهجي.
انڊوومينٽ فنڊ: صوبائي ڪابينا سيڙپڪاري کاتي پاران تجويز ڪيل سيڙپڪاريءَ کي هٿي وٺرائڻ وارن پروگرامن لاءِ ڪمٽمينٽ ۽ پارٽنرشپ جي لاءِ 100 ملين رپين جو انڊوومينٽ فنڊ قائم ڪرڻ جي منظوري ڏني. سنڌ ڪابينا شهيدن جي سڃاڻپ ۽ معاوضو رولز 2022 جي منظوري ڏني. ڪابينا سنڌ سينيئر سٽيزن ڪارڊ جي ڊيزائن جي پڻ منظوري ڏني.

Follow by Email
YouTube
YouTube